Алматыда өткен Дженнифер Лопестің концерті қорытындыланды. Орталық стадиондағы ауқымды шоуға 27 мың көрермен жиналған. Оның шамамен 7 мыңы ТМД елдерінен бастап АҚШ, Канада, Түркия, Жапония, Қытай, Германия, Ұлыбритания, Франция секілді 35 мемлекеттен арнайы келген.
Билет бағасы 40 мыңнан 180 мың теңгеге дейін жеткен. Ұйымдастырушылардың алдын ала жасаған есебі бойынша бұл іс-шарадан бюджетке түсетін салық көлемі 600 млн теңге шамасында болмақ.
Up All Night туры аясында алты апта бойы әлем елдерінде Дженнифер Лопестің концерттерінде бас режиссёр болған Кристиан Ламб пен Алматы, Астана және Ташкент қалаларында артистпен бірге жұмыс істеген техникалық директор Григорий Антропов Алматыдағы сахнаның, шоу өткен алаңның дайындығын барлық алаңдардың ішіндегі ең үздігі деп атап, ұйымдастырушылар еңбегін жоғары бағалады. Бұл туралы First Media Group өкілі мәлімдеді.
«Әлемдік деңгейдегі жұлдыздың командасынан мұндай жоғары баға алу бізге үлкен шабыт береді. Дженнифер Лопестің концертін жоғары деңгейде өткізе алғанымызға қуаныштымыз.
Біз өз тарапымыздан концерттен кейін талдау жұмыстарын жүргіздік. Алдағы уақытта ескеріп, жетілдіруге болатын тұстары да бар екенін білеміз. Сол үшін келешекте одан да жоғары деңгейге шығу мақсатында нақты жоспар құрып жатырмыз. Концертке келіп, пікір білдірген барлық көрерменге алғыс айтамыз», — деді First Media Group басқарушы директоры Әлфия Нұрғұмарова.
Іс-шараның қала экономикасына тигізген әсері де ауқымды. Mastercard төлем жүйесінің дерегіне сүйенсек, шетелдік туристер Алматыда орта есеппен үш жарым күн аялдап, тәулігіне шамамен 440 долларды қонақүй, тамақ, көлік, экскурсия және саудаға жұмсайды. Концерт күндері тек шетелдік қонақтар қалаға шамамен 5 миллиард теңгеден астам табыс әкелді.
Бұл уақытта мейрамханалар, кофеханалар, қонақүйлер мен түрлі көлік компаниялары да қосымша пайда тапты. Тағы бір мысал, концерт өткен күні стадион аумағындағы фуд-корт 15 миллион теңге табыс тапқан.
Туризм басқармасының пайымдауынша, көрермендердің шығыны мен жанама кірістерді қоса есептегенде, концерттен қалаға түскен табыс айналымы 10 миллиард теңгеден асады. Мұндай мәдени іс-шаралар қала қазынасына қомақты кіріс әкеліп қана қоймай, Алматының туристік тартымдылығын арттырып, оны әлемдік гастроль картасындағы маңызды орталық ретінде нығайтады.