Бұл туралы қалалық Туризм басқармасының өкілдері айтты, – деп хабарлайды aqshamnews.kz тілшісі.
2026 жылдың бірінші жартыжылдығында Алматының көрме стенді қаланың туристік әлеуетін тиімді таныстырғаны үшін бірнеше халықаралық марапатқа ие болды.
Мумбай қаласында өткен OTM-2026 халықаралық көрмесінде Алматы стенді «Қалалық туризмді үздік ілгерілеткені үшін» марапатына ие болды. Көрме барысында шетелдік туроператорлармен іскерлік кездесулер өткізіліп, олардың қорытындысы бойынша Алматыға турист тарту жөніндегі келісімдерге қол қойылды.
Сеулде өткен SITF-2026 көрмесінде Алматы стенді мазмұны мен таныстырылымының жоғары деңгейі үшін The Best Booth Content Award сыйлығын иеленді.
Ал үшінші марапат Гонконгта өткен ITE Hong Kong 2026 халықаралық көрмесінде берілді. Алматы көрме ұйымдастырушыларының арнайы Outstanding Performance Booth сыйлығына ие болған жалғыз қатысушы атанды.
Қалалық Туризм басқармасының мәліметінше, халықаралық көрмелерге қатысу Алматыны шетелдік нарықтарда кеңінен танытуға, серіктестік желісін кеңейтуге және қаланың туристік бағыт ретіндегі танымалдылығын арттыруға мүмкіндік береді.