Әлеуметтік желілер мен цифрлық әлемде жаңа серпіліс жасаған атыраулық әже таптаурындар мен стереотиптерді бұзып, шынайы үлгі көрсетуде, деп хабарлайды aqshamnews.kz.
70 жасар атыраулық әже тиктокта стрим жүргізіп, 10 миллион тапқан. Иә-иә, тиктокерлердің арасында қазақтілді әжеміз топ бастап, 250 мың оқырман, ондаған миллион лайк жинап, жергілікті танымал тұлғаға айналған десек те болады.
Әжеміз 26 жасында жесір қалып, 40 жыл бойы еден жуушы болып, күн көрген, бала-шағасын баққан екен. Ал қазір жастарды шаң қаптырып, миллионер атанып отыр.
Өмірінде көп қиындықтар мен ауыртпалықтарды бастан өткерген, бірақ ешқашан қолды бір сілтеп берілмеген қазақ әйелі бүгінде заманауи әлемнің талабы мен мүмкіндіктерін ұтымды пайдаланып отыр. TikTok сияқты платформаларда жас та, жасамыс та өзін танытып, бақ қуа алады деген әжеміз – осының айқын дәлелі.
Тек елімізде ғана емес, бүкіл әлемде қартаюды мүлдем басқа тұрғыда көретін жаңа көзқарас қалыптастырып отырған әженің жетістігі жастарға да үлкен ынталандыру болып табылады.