Елдің тарихында кейбір жандар болады, солардың есімі әрқашан ұрпақ жүрегінде сақталады. Солардың бірі – қазақтың даңқты қызы, Кеңес Одағының Батыры Әлия Молдағұлова. Биыл оның 100 жылдық мерейтойы аталып өтті. Алматы қаласында ұйымдастырылған «Әлия. Мәңгілік ерлік» атты концерт-спектакль – тек өнер кеші ғана емес, жүректерге ерлік пен батырлық ұялататын рухани сабақ болды.
Әлия жасына қарамастан, елі үшін жанын қиған, қиын сәтте батылдығымен халықты таңғалдырған. Оның ерлігі – тек сол дәуірдің ғана емес, бүгінгі ұрпақ үшін де үлгі. Бізге керек нәрсе – ұрпақты отансүйгіштікке, намысқа тәрбиелеу, рухын биік ұстау. Сол себепті бұл шара маңызы жағынан ұмытылмас оқиға болды.
Кеш барысында Қазақстанның халық әртісі Лидия Каден ана бейнесіндегі монологымен шынайы өнер көрсетті, әр сөздің астарында терең ой жатыр. Халықаралық және республикалық байқаулардың лауреаты Алмагүл Батталиева батыр рухына арналған «Әлия» әнімен жүректерді дірілдетті. Жас әртістердің театрландырылған көріністері ерліктің мәнін көркем тілмен жеткізді.
Қазақ эстрадасының жұлдызы Рустем Нұржігіттің «Кестелі орамал» әні, Петропавл қаласының «Sensitive» би театрының өнері кештің көркін ашты. Соңында «Алашұлы» тобы «Атамекен» әнімен халыққа сүйіспеншілікті, елге адалдықты еске салды.
Өнер мен ойдың қосындысы арқылы, бұл шара бізге бір нәрсені тағы еске салды: ерлік – мәңгілік, батырлық – ұрпақтың жүрегінде сақталатын қазына. Әлияның өмірі – ел сүйген, намысымен ерекшеленген адамның үлгісі. Сол үлгі әр жүректе өшпес шам болып жарқырауы керек.
«Алатау» дәстүрлі өнер театрының
Әдебиет бөлім басшысы
Аубакирова Инара