Көктемнің алғашқы шуақты күнімен қатар келген Алғыс айту күніне орай Алатау ауданының комьюнити орталығында ерекше акция өтті, деп хабарлайды aqshamnews.kz
Іс-шараның басты мақсаты – адамдар арасында ризашылық сезімін арттырып, жылы қарым-қатынасты нығайту.
Комьюнити орталығының координаторы Даркенбай Дамир:
“ Бұл акция қатысушыларға жақындарына, әріптестеріне, достарына алғыс білдіру мүмкіндігін сыйлайды. Арнайы дайындалған ағаш бейнесіндегі баннерге келген қонақтар өздерінің жылы лебіздері мен алғыс сөздерін түрлі-түсті стикерлерге жазып, жапыстырады. Осылайша, әрбір қатысушы ризашылық білдіру арқылы ортақ жылулық пен мейірімділік атмосферасын қалыптастырады деп білемін” -дейді.
Іс-шараға әртүрлі жастағы адамдар қатысты. Бірі ата-анасына алғыс білдірсе, енді бірі ұстаздарына, достарына, әріптестеріне ризашылықтарын жазды. Көпшілігі бұл акцияның адам бойындағы жақсы сезімдерді оятып, рухани байланыстарды нығайтуға көмектесетінін де атап өтті.
Бұл қоғамдық шараның маңызы қандай?
“Алғыс ағашы” сынды акциялар адамдардың бір-біріне деген құрметі мен ықыласын арттырып, қоғамдағы жылулықты еселей түседі. Мұндай іс-шаралар тек бір күндік емес, адамдардың күнделікті өмірінде де алғыс айтуды әдетке айналдыруына ықпал етеді.Алатау ауданының комьюнити орталығы алдағы уақытта да осындай игі бастамаларды жалғастыруды жоспарлап отыр.