2024 жылғы егіннен астықтың келуіне байланысты әлемдік нарықта бидай мен арпа бағасының өсу үрдісі байқалуда.
Ағымдағы жылдың шілде айында егін жинау жұмыстары басталғалы, Қара теңіздегі ресейлік бидайдың экспорттық бағасы 216 АҚШ долларына жетті. Логистика шығынын ($90/т) алып тастағанда, Қазақстандағы бидай бағасы 61 мың теңге/т шамасында болды. Алайда, Қара теңіздегі бидайдың бағасы тоннасына 250 долларға дейін немесе 78 мың теңге/тоннаға дейін көтерілді, деп хабарлайды aqshamnews.kz.
Экспорттық бағадан кейін Ресей нарығындағы бидай бағасы да артты. Қазіргі уақытта Омбы облысында 23% клейковинасы бар 3-сыныпты бидай бағасы 14,5 мың рубль/т болып отыр. Көлік шығыстарын (2 мың рубль/тонна) ескерсек, Көкшетаудағы ресейлік бидай бағасы 84 мың теңге/тоннаға жетті.
Қазақстандық бидай бағасы 74-81 мың теңге/тонна деңгейінде сақталуда, бұл отандық өндірушілерге қолайлы бәсекелестік жағдайды қамтамасыз етеді. Орталық Азия елдерінің сатып алушылары Ресей бағасына негізделген 65-70 мың теңге/тонна деңгейінде ұсыныс беруде. 23% клейковинасы бар бидай үшін 75 мың теңге/тоннаға дейін өсу мүмкіндігі бар, өйткені бұл нарықтар үшін балама жеткізілім жоқ.
Арпа бағасы бойынша да ұқсас үрдіс байқалуда. Қара теңіздегі экспорттық арпаның бағасы 206 АҚШ долларына дейін көтерілді, әрі бұл үрдіс жалғасуда. Қазақстандық арпа бағасы Ақтау портында 165-168 доллар/т деңгейінде, және кем дегенде 175-185 АҚШ доллары/т деңгейіне дейін көтерілу мүмкіндігі бар. Бұл жағдайда арпа бағасы тоннасына 47-50 мың теңгеден 55-60 мың теңгеге дейін көтеріледі.