Қазіргі таңда әлемнің 18 елінде 56 атом реакторының құрылысы жүргізіліп жатыр.
Бұл реакторлар әлемдік стандарттарға сай, табиғи және техногендік жағдайларды ескере отырып салынуда, деп хабарлайды aqshamnews.kz
Яғни, заманауи атом электр станциялары (АЭС) 8 балдық жер сілкінісіне, цунами сияқты апаттарға, тіпті үлкен ұшақтың құлауына және басқа да төтенше табиғи құбылыстарға төтеп бере алатындай қауіпсіздікпен жабдықталған.
АЭС-тегі қауіпсіздік деңгейі өте жоғары.
Мамандардың айтуынша, АЭС-тегі апат ықтималдығы 10 миллион жылда бір ғана оқиға ретінде бағаланады. Ал бүгінгі таңда еліміздің басым бөлігін электр энергиясымен қамтамасыз етіп отырған көмір электр станцияларының қауіп-қатері АЭС-тен 80 есе жоғары. Бұл — атом энергетикасының қауіпсіздігі мен сенімділігінің маңызды көрсеткіші.
Әлемдегі жұмыс істеп тұрған барлық реакторлар қатаң бақылауда.
Олардың әрқайсысының жұмысы МАГАТЭ және WANO (Дүниежүзілік атом электр станциялары қауымдастығы) сияқты беделді ұйымдар тарапынан бақыланады. Бұл қадағалау халықаралық стандарттарға сай қауіпсіздікті қамтамасыз ету мақсатында тұрақты жүргізіліп, әлемдік қоғамдастықтың сенімін арттыруға бағытталған.
Атом энергетикасы — еліміздің энергетикалық тәуелсіздігін қамтамасыз етудің тиімді әрі экологиялық таза жолы. Заманауи технологиялар арқылы салынған АЭС-тер тек қана энергия көзі емес, сонымен қатар, экономиканы тұрақты және қауіпсіз дамытуға мүмкіндік береді.