Мемлекет басшысының Қазақстан халқына Жолдауының басты қағидаттары баяндалды.
Д.А.Қонаев атындағы Заң академиясының қабырғасында Президент Жолдауын талқылауға арналған алқалы жиын өтті, деп хабарлайды Almaty-akshamy.kz.
Іс-шараға Д.А.Қонаев атындағы Заң академиясының ректоры Өмірәлі Жалаири, заң ғылымының докторы Айтқожин Көшекұлы, профессор Еркінбек Рақымбаев бастаған осы оқу орнының оқытушылары, студенттері, т.б. жетекші мамандар қатысты.
Жиын барысында Қазақстан Республикасының Президенті Қ.К.Тоқаевтың «Әділетті мемлекет. Біртұтас ұлт. Берекелі қоғам» атты Жолдауының мән-маңызы, халыққа берер пайдасы, құқықтық мемлекетке айналу мәселесі, азаматтардың ой-пікірінің ашық жүруі, Конституциялық реформалар, т.б. жайында кеңінен айтылды. Мемлекет басшысының Қазақстан халқына Жолдауының басты қағидаттары баяндалды. Ол туралы Д.А.Қонаев атындағы Заң академиясының ректоры Өмірәлі Жалаири айтып өтті.
– Ел Президенті Қасым-Жомарт Тоқаевтың кезекті Жолдауын халық ыстық ықыласпен қабылдады. Енді алдымызда жаңа бастамалар күтіп тұр. Оны жүзеге асыру бәрімізге ортақ шаруа. Сондай-ақ, құқықтық мемлекетке айналуымыз керек. Егер осыны іске асырсақ, соттың әділдігі, заңдардың орындалуы сияқты дүниелер біртіндеп шішіле бермек, – деді ол.
Сондай-ақ, дүниежүзіндегі саяси тәжірибе, оның қоғамға тигізер әсері де айтылмай қалған жоқ.
– Біз тарихи кезеңге аяқ бастық. Еліміздегі саяси өзгерістердің ауқымы кең. Бұндай өзгерістер әлемде бар тәжірибе. Бұрынғы Парламент өз деңгейінде жұмыс атқара алмады. Соның нәтижесінде құқықтық мемлекетке айналудың жолдары ашық бола қойған жоқ. Сондықтан құқықтық-нормативтік заңдар дұрыс жұмыс істей алмады. Әлі күнге дейін Президенттің өкілеттіліктеріне байланысты Парламент жұмысын нақтылай жүргізе алмадық. Мемлекет басшысының 7 жылдық мерзім дегені оң ой. Алдағы уақытта осы мәселелерді құқықтық жолмен шеше алсақ, нұр үстіне нұр болмақ, – деді Айтқожин Қабулсамих.
Сонымен қатар, жиында парламенттік республикаға қатысты пікірлер айтылды. Оның мемлекетке берер әсері сөз болды.
– Әлемдегі ахуал өзгеріп барады. Көрші Қырғыз елі парламентік республика болды. Бірақ онда толқулар өтіп, тұрақсыздықтар орын алды. Олар қайтадан Президенттік басқару режиміне қайтып келді. Егер біз де Парламентке бар күшті берсек, қырық пышақ болып қалуымыз мүмкін. Сондықтан Президенттік басқару болуы қажет. Ең бастысы, жемқорлықты жою шарт. Бұл – уақыт күттірмейтін мәселе. Дәлірек айтқанда, бейжай қарауға болмайды. Мейілінше заң үстемдігін іс жүзінде жүзеге асырайық, – деді заң ғылымының докторы Еркін Дүйсенов.