Астанадағы ҚР Президентінің орталығында «Astana Eurasian Book Fair-2025» VIII Халықаралық кітап көрме-жәрмеңкесі өтіп жатыр.
Кітап көрме-жәрмеңкесінің ұйымдастырушысы – «Фолиант» баспасы», деп хабарлайды aqshamnews.kz.
Көрмеге Қазақстан, Ресей, Түркия, Испания, Иран, Өзбекстан, Португалия және Қытай елдерінен 70-ке жуық баспа, кітап сату, танымдық-ғылыми білім беру және полиграфиялық компания қатысуда.
Көрменің басты мақсаты – кітап оқуды насихаттау, оқу мәдениетін қалыптастыру, кітап нарығындағы жаңа өнімдерді көпшілікке таныстыру, баспа ісіндегі заманауи технологияларды көрсету және халықаралық әріптестікті дамыту.
Көрмеге Қазақстан Республикасының Мемлекеттік кеңесшісі Ерлан Қарин келіп, мемлекет басшысы Қасым-Жомарт Тоқаевтың Атырау қаласында өткен Ұлттық құрылтайда құрылтай мүшелерінің Ұлттық кітап күнін белгілеу туралы бастама көтергенін атап өтті.
Президенттің бұл бастамасы қолдауға ие болып, биыл «Ұлттық кітап күнін» алғаш рет атап өтудеміз. Қазіргі қоғамның негізі үш тірегі – ғылым, мәдениет және білім. Осының аясында халық арасында жалпыұлттық сауалнама жүргіземіз деп шештік. Сауалнама нәтижесіне сәйкес, таңдаулы 100 кітаптың тізімін жасақтаймыз. Оның мақсаты – азаматтарды авторларды, туындыларды талқылауға шақыру. Сауалнама eFov Mobile порталы арқылы жүргізіледі. Кез келген еліміздің азаматы порталға тіркеліп, өзінің 10 сүйікті таңдаулы кітабын ұсына алады. Кітаптардың жанры әртүрлі болуы мүмкін. Осылайша, зерттеу жүргізе отырып, ең үздік 100 кітапты жасақтаймыз. Сауалнама үш ай бойы жүргізіледі. Нәтижесі тамыз айында Абай күні қарсаңында белгілі болады, – деді ол.
Іс-шара аясында балаларға, жасөспірімдерге және ересектерге арналған жаңа кітаптардың тұсаукесер рәсімдері, белгілі жазушылармен және ақындармен кездесулер мен автограф-сессиялар, баспа саласының мамандарына арналған кәсіби пікірталастар мен кездесулер, сондай-ақ балаларға арналған кітап оқу сессиялары, шеберлік сабақтары мен шығармашылық кездесулер ұйымдастырылған. Сонымен қатар қатысушылар үшін құнды сыйлықтар ойнатылады.
Көрменің дәстүрлі бөлігі болып саналатын «Жылдың үздік кітабы» байқауы мына номинациялар бойынша ұйымдастырылды: «Жыл кітабы», «Үздік дебют», «Үздік көркем әдебиет туындысы», «Нон-фикшн жанрындағы үздік кітап» және «ТҮРКСОЙ-дың Гран-приі».
Айта кетейік, кітап көрмесі 23-27 сәуір күндері аралығында жалғасады.