Еліміз бойынша жел күшейіп, тұман және көктайғақ болады.
Атлант мұхитынан келген ылғалға толы циклон Қазақстан аумағындағы ауа райына ықпал етеді, деп хабарлайды aqshamnews.kz
Циклонның фронтальды бөліктерінде қар, бұрқасын күтіледі, еліміздің батысы мен оңтүстігінде, ал 20-21 қаңтарда солтүстік өңірлерде жаңбыр мен қар аралас жауын-шашын болжанып отыр.
18 қаңтарда Түркістан облысында түнде қатты жауын-шашын күтіледі.
Қатты қар 20 қаңтарда Ұлытау, 21 қаңтарда Ақтөбе, Қостанай және Солтүстік Қазақстан облыстарында, 21-22 қаңтарда Ақмола облысында, 22 қаңтарда Павлодар, Қарағанды, Түркістан, Жамбыл және Абай облыстарында жауады. 22-23 қаңтарда Шығыс Қазақстан, Алматы және Жетісу облыстарындада күтіледі.
22 қаңтардан бастап суық ауа массасы таралып, түнде температура айтарлықтай төмендейді:
батыста температура 10-20 градус аяз;
солтүстік-батыс пен солтүстікте 20-30 градус аяз;
орталық пен шығыста 25-35 градус аяз;
оңтүстікте 12-25 градус аяз;
Қазгидромет мамандары ел тұрғындарын қатты аяз бен күрделі ауа райына дайын болуға шақырды.