Парламент палаталарының бірлескен отырысында «Алатау қаласының арнаулы мәртебесі туралы» конституциялық заң жобасы бірінші оқылымда қолдау тапты. Құжат Алатаудың жедел дамуына жағдай жасап, оны арнайы құқықтық режимі бар жаңа орталық ретінде дамытуға бағытталған, деп хабарлайды Aqshamnews.kz тілшісі.
Парламент палаталарының бірлескен отырысында «Алатау қаласының арнаулы мәртебесі туралы» конституциялық заң жобасы бірінші оқылымда мақұлданды.
Бұл заң жобасы Мемлекет басшысының 2025 жылғы Жолдауында айтылған бастамалар мен Алатау қаласын дамыту туралы Жарлығына сәйкес әзірленген. Үкімет құжатты қаланың қарқынды әрі тұрақты дамуын қамтамасыз ету мақсатында дайындаған.
Заң жобасы Президент айқындаған негізгі тәсілдер мен қағидаттарға сүйенеді. Құжаттың басты міндеті – Алатау қаласының дамуына құқықтық және институционалдық негіз қалыптастыру.
Жуырда қабылданған Конституцияда жекелеген өңірлердің экономикалық әлеуетін жедел арттыру үшін «қарқынды дамитын қала» атты арнаулы құқықтық режимді конституциялық заң арқылы енгізу мүмкіндігі қарастырылған.
Осыған сәйкес Алатау қаласы дербес экожүйе ретінде дамытылады. Ол жеке қаржылық модельге, арнайы басқару тетіктеріне және жаңа институционалдық негізге сүйенеді.
Заң жобасын екінші оқылымға дайындау үшін арнайы комиссия құрылды.