Алатау қаласында инвесторларға берілетін жер телімдері тек нақты инвестициялық жобаларды жүзеге асыру үшін ғана ұсынылады. Егер инвестор екі жыл ішінде өз міндеттемесін орындамаса, оған айыппұл салынып, жоба тағы екі жылда жүзеге аспаса, жер мемлекетке қайтарылады, деп хабарлайды Aqshamnews.kz тілшісі.
Премьер-министрдің орынбасары Қанат Бозымбаев Парламент палаталарының бірлескен отырысында Алатау қаласындағы жер қатынастары арнайы режиммен реттелетінін мәлімдеді.
Оның айтуынша, қала аумағында арнайы жер қоры қалыптастырылады. Бұл қор стратегиялық және инвестициялық жобаларды іске асырудың маңызды құралына айналып, өңірдің дамуы мен экономикалық өсіміне серпін бермек.
Қанат Бозымбаевтың сөзінше, инвесторларға жер учаскелері бизнес-лицензия немесе келісімшарт негізінде беріледі. Алайда мұндай телімдер тек нақты инвестициялық міндеттемелермен байланыстырылады.
Вице-премьер жер мәселесі қоғам үшін әрдайым өзекті екенін атап өтті. Осыған байланысты Алатау қаласында, соның ішінде шетелдік инвесторларға да, жер тек белгілі бір инвестициялық жобаларды жүзеге асыру үшін ғана ұсынылады.
Ол жер телімдері жалға беру немесе өзге де заңды тетіктер арқылы рәсімделетінін жеткізді. Сонымен қатар инвесторларға нақты талаптар қойылып, оларды орындауға белгілі бір мерзім беріледі.
Егер инвестор екі жыл ішінде өзіне жүктелген міндеттемелерді орындамаса, мысалы зауыт, фабрика, университет немесе қонақүй секілді нысандарды салу жұмыстарын бастамаса, оған айыппұл салынады. Ал одан кейінгі екі жыл ішінде жоба толыққанды дамытылмаса, жер учаскесі мемлекет меншігіне қайтарылады.
Қанат Бозымбаев жер телімдері тек инвестициялық және іскерлік мақсатта пайдаланылатынын айтты. Ал Қазақстан азаматтарына қатысты жер қатынастары қолданыстағы заңнама аясында реттеле береді.