2023 жылы әл-Фараби дағылының Торайғыров көшесіндегі жолайрықтан Достық даңғылындағы жолайрыққа дейінгі аралығындағы жалпы ұзындығы 9,3 шақырымды құрайтын бөлігінде орташа жөндеу жұмыстары жүргізу жоспарланған. Қазіргі кезде жөндеу жұмыстары көлік қозғалысын ішінара шектеп қана жүргізілуде.
Жөндеу жұмыстары аясында жолдағы жиектастарды тегістеу қарастырылған. Тегістеу кезінде жиектастар алынып, жолдың бойында тиісті деңгейде қайта орнатылады.Жөндеу жұмыстары жүріп жатқан аумақта 34 500 м жиектас болса, соның тек 7683 метрі ғана алынып, сол жерге қайта орнатылады.
Мердігер ұйым өкілдері атап өткендей, жиектастар ауыстырылмайды, себебі олар граниттен жасалған және өте төзімді. Олар тек тегістеледі. «Тегістеу дегеніміз – қисайған жиектастарды алып, қайта орнына орнату. Жол қозғалысы кезінде жиектастарға машиналар тиіп кетуі мүмкін немесе арнайы техника қар тазалау кезінде қисайтып кетуі мүмкін. Жиектас пен жол жабынының арасындағы саңылаулар жол бетінде жарықтардың пайда болуына алып келуі мүмкін. Жұмыс сапасын арттыру үшін асфальтты бетон жабынын төсер алдында жиектастар тегіс әрі тік тұруы тиіс», - деді компания өкілі.
Еске сала кетейік, әл-Фараби даңғылы бұған дейін 2010 жылы жөнделген. Жөндеуаралық мерзімнің өтуіне байланысты тексеру жұмыстары жүргізіліп, нәтижесінде жол бойында шұңқыр, ойылған, жарылған, отырған жерлер анықталып, жолдың жағдайы туралы техникалық қорытынды жасалды. Техникалық қорытынды негізінде аталған учаскелерді орташа жөндеу жұмысы жоспарына қосылды.
Алматы қалалық мобилділік басқармасы