Бүгін “Alatau-Aqparat” медиахолдингінің шаңырағында Әл-Фараби атындағы Қазақ ұлттық университетінің Басқарма мүшесі – әлеуметтік даму жөніндегі проректоры Бақытжан Омаров қонақта болды. Құрметті мейманды медиахолдингтің бас директоры Ержан Қалымбайұлы және ұжым мүшелері қарсы алды.
Бақытжан Омаров өз сөзінде университет ректоры Жансейіт Қансейітұлы Түймебаевтың бастамасымен ҚазҰУ-да ауқымды істер атқарылып жатқанын атап өтті.
“Бүгінде университет жасанды интеллектіні дамыту, робототехника мен суперкомпьютер орталығының жұмысын жетілдіру бағытында нақты қадамдар жасап келеді. ҚазҰУ базасындағы суперкомпьютер — Орталық Азиядағы ең қуатты есептеу құрылғыларының бірі, ал жақын уақытта университет ғалымдары дрон құрастыру жобасын іске қоспақ”, - деді ол.
Кездесу барысында тараптар медиа және білім саласындағы өзара байланыстарды нығайту, жаңа жобаларды жүзеге асыру және жас мамандарды даярлау бағытындағы серіктестікті талқылады. Әсіресе, ҚазҰУ студенттерінің тәжірибеден өту мүмкіндігін кеңейту, өңірлік медиа кеңістікте өздерін кәсіби тұрғыдан шыңдау мәселелеріне ерекше назар аударылды.
Өз кезегінде медиахолдинг басшысы Ержан Қалымбайұлы жоғары оқу орындарымен тығыз байланыс орнатудың маңыздылығына тоқталды. Оның айтуынша, “Alatau-Aqparat” редакциялары жас журналистерге кәсіби ортада тәжірибе жинақтап, заманауи медиа үрдістермен танысуға мүмкіндік беруге дайын.
Бұрыннан бар меморандум аясында медиахолдинг жұмыс беруші ретінде жыл сайын ҚазҰУ студенттерін жұмысқа қабылдап келеді.
Кездесу барысында Бақытжан Омаров жаңадан ашылған телестудияның жұмысымен және талай жылдық тарихы бар медиахолдингтің музей-кабинетімен танысты.
Кездесу соңында тараптар өзара ынтымақтастық туралы келісімге келіп, алдағы уақытта бірлескен жобалар, оның ішінде, “Вечерний Алматы” газетінің 90 жылдығы аясында бірлескен жобалар мен іс-шаралар ұйымдастыруға уағдаласты.