Бас прокурордың орынбасары Ұлан Байжанов елден заңсыз шығарылған активтерді қайтару мәселесімен айналысатын арнаулы ведомствоның штаты қалай құрылатынын түсіндірді, деп хабарлайды Almaty-akshamy.kz.
Ол бұл органның тезірек құрылуына мүдделі екенін айтты. Бірақ, бұл жерде осы ведомство жұмысының ерекшелігін ескеру қажет.
«Біз моральдық-этикалық нормалар тұрғысынан да, дайындық сапасы мен құзыреті жағынан да лайық мамандарды таңдауымыз керек. Осы заңның («Заңсыз иемделген активтерді мемлекетке қайтару туралы») орбитасына тартылатын субъектілер халықаралық консалтингтік, аудиторлық, заңгерлік компанияларды жалдауға мүмкіндігі бар ауқатты адамдар екенін түсінуіміз керек. Олар өте жақсы қорғалған. Бұл тұрғыда біздің жақтан да осындай жоғары деңгейдегі мамандар болуы керек. Сондықтан, жұмысқа қабылдау мәселесіне ерекше көңіл бөлінеді. Осы орайда, жұмысқа алынатын қызметкерлерге қатысты қойылатын тиісті талаптарды әзірлеуге кірісіп жатырмыз», - деді Ұ. Байжанов Сенаттың жалпы отырысынан кейін тілшілер сұрағына жауап бере отырып.
Оның айтуынша, штат 130-ға жуық адамнан құралуы мүмкін. Оның басым бөлігі немесе жартысы ауқымды деректермен жұмыс істейтін әрі деректерге талдау жүргізетін ақпараттық сараптама орталығында қызмет етеді.
«Тиісті анықтамалық жұмыстарды қамтып, сарапшылар мен мамандарды жұмылдырамыз. Өзімізге пайдалы болуы мүмкін барлық дереккөзді көтеріп, онда керек мәліметтерді зерттейміз», - деді Бас прокурордың орынбасары.
Бұдан бұрын хабарланғандай, бүгін Сенаттың жалпы отырысында палата депутаттары «Заңсыз иемделген активтерді мемлекетке қайтару туралы» Заңды мақұлдады. Заңда активтерді қайтарудың ерікті немесе мәжбүрлі тәртібі көзделген.
Заңның негізгі мақсаты – Қазақстан Республикасының аумағында да, одан тыс жерлерде де заңсыз иемделген активтерді қайтару үшін заңнамалық параметрлерді айқындау, сондай-ақ оларды заңсыз иемденуге және шығаруға ықпал еткен жағдайларды жою.
Бас прокуратураның құрылымында заңсыз шығарылған активтерді қайтару жөніндегі жеке ведомство құрылады. Ол осы саладағы уәкілетті органның функцияларын орындайды.