Алматының Қала құрылысын бақылау басқармасы құрылыс нормаларын өрескел бұзған мердігер ұйымдарға қатысты қабылданып жатқан шаралар туралы хабарлады.
Кеше "AsiaMaх" ЖШС-і Әбіш Кекілбайұлы көшесіндегі сыртқы кәріз желісін қайта жаңарту жұмысы бойынша, сондай-ақ "СК 7 строй" ЖШС-і көркейту және білім беру нысандарындағы құрылыс жұмысы үшін құрылыс лицензиясынан айырылды.
Басқарма тағы бірқатар ұйымға қатысты шаралар қабылданғанын хабарлады. Мемлекеттік "№174 мектеп-гимназиясы" ғимаратына салынған қосымша нысанның құрылысы бойынша жүргізілген жоспардан тыс тексеру барысында жобалық шешімдерден ауытқу және мемлекеттік құрылыс нормаларының сақталмауы анықталды. Осыған байланысты "Құрылысшы-ТБС" ЖШС құрылыс қызметінің бірқатар кіші санаты бойынша лицензиясынан айырылды.
Айта кетейік, бұған дейін техникалық қадағалауды тиісінше орындамаған "Алатау сапа құрылыс" ЖШС аккредитациясынан айырылған болатын. Ұйым қызметкерлерінің бақылауды дұрыс жүргізбеуі Яссауи мен Дастан көшелерінің қиылысында асфальт жабындысының опырылуына себеп болған. Сондай-ақ, Аманжол көшесіндегі жол жабындысының шөгуіне жол берген "Аркада KZ" ЖШС әкімшілік жауапкершілікке тартылды.
Аталған нысандарда жұмыс жүргізген екі мердігер ұйым да әкімшілік жауапкершілікке тартылып, анықталған бұзушылықтарды жою туралы нұсқама берілді.
Қала құрылысын бақылау басқармасында атап өткендей, қала әкімі Дархан Сатыбалдының тапсырмасына сәйкес құрылыс нысандарына бақылау күшейтілді, және анықталған бұзушылықтар бойынша шаралар заңнамаға сай қабылданады.