Астанада ерлікпен қаза тапқан өрт сөндіруші Асқар Забикулин туралы «Қаһарман» сериалы түсіріліп жатыр. Бұл туралы оның жесірі Анель Забикулина өзінің Instagram парақшасында хабарлады.
«Түсіру тобы Астанаға келіп, бірден жұмысқа кірісті. Әрине, бүкіл процесті өз көзімізбен көру мүмкіндігін жіберіп алмадық. Айта кетейін, кино түсіру оңай емес. Біз ол жерде 5 сағаттай болдық. Түсірілімге дайындық, бірнеше дубль, ракурс, жарық. Бұл – бір ғана көріністі түсіру кезінде көрген қиындықтың кішкене ғана бөлігі. Барлық түсірілім тобына қажырлы еңбегі үшін рахмет. Сериал барлығына ұнайды деп сенемін», – деп жазды Анель Забикулина.
Айта кетейік, былтыр қарашада елордада 15 қабатты үйден өрт шығып, салдарынан 3 адам, оның ішінде бір бала ауруханаға түскен болатын. Бірнеше адамды құтқарған өрт сөндіруші Асқар Забикулиннің денесінің 80%-ын күйік шалып, жансақтау бөліміне жатқызылады. Өкінішке қарай, бірнеше күннен соң көз жұмды.
Марқұмның жары парақшасына тағы бір әсерлі фото жариялады. Онда кішкентай қызы сериалдың басты кейіпкері – әкесінің рөлін сомдап жатқан актерды құшақтап тұр. «Кинодағы әкесін құшақтап тұрған қызымның кішкентай ғана жүрегін мен жақсы түсінемін, өрт сөндіруші формасындағы ер адамдардан әкесін көретіндей... арасынан әкесі шыға келетіндей...» деп жазды сурет астына.
Өрт сөндіруші Асқар Забикулин I дәрежелі «Айбын» орденімен марапатталды. 20 желтоқсанда оған «Алтын адам» сыйлығы табыс етілді. Есімі елорданың жаңа көшелерінің біріне берілді.