Ғалымның айтуынша, конституция – мемлекет пен қоғамның қарым-қатынасын айқындайтын, азаматтардың құқығы мен міндетін бекітетін, биліктің қызмет ету қағидатын белгілейтін мемлекеттің басты заңы, – деп хабарлайды aqshamnews.kz тілшісі.
Академик, профессор әрі қоғам қайраткері Асқар Жұмаділдаев қазақстандықтарды Қазақстан Республикасының жаңа конституциясының күшіне енгенімен құттықтап, оны еліміздің әрі қарайғы дамуын айқындайтын маңызды құжат деп бағалап отыр.
«Заманның талабына толық жауап беретін жаңа конституцияда қоғамның қажеттілігі толық ескерілген деп айтуға болады. Онда мемлекеттік басқару жүйесіндегі маңызды өзгеріспен қатар, елдің дамуының жаңа бағыттары да көрініс тапқан. Бүгінде ғылымға, білімге, цифрландыру мен жасанды интеллект технологиясын дамытуға ерекше көңіл бөлініп жатыр. Бұл басымдықтың барлығы бәсекеге қабілетті әрі заманға сай мемлекет құру бағытына толық сәйкес келеді», – дейді Асқар Жұмаділдаев.
Ол жаңартылған негізгі заң Қазақстанның одан әрі дамуына берік құқықтық негіз қалыптастырып, әділеттілік, заңдылық пен құқықты үстем ететін қағидаттарды нығайтуға сеп болатынын атап өтті.
Сөз соңында академик барлық азаматты жаңа конституцияның күшіне енуімен құттықтап, елімізге бейбітшілік пен бақ-береке тіледі.