Жетісу ауданына қарасты №43 жалпы білім беретін мектеп ауласы мерекедегідей безендірілген, деп хабарлайды Аlmaty-akshamy.kz.
Аулаға кірген сәтте-ақ күмбірлеген күй бойды алып, үлкен бір думанды салтанаттың болып жатқанын айшықтай түскендей. Аталмыш мектепке орналасқан №343 сайлау учаскесіне келіп, өз даусын беріп жатқан адамдардың қатары да жиілей түскен.
– Өз жұмысымызды таңғы 6.00-де бастадық. Әнұран орындалып болған соң, бақылаушыларды тіркедік. Ең алғашқы дауыс берушіміз Серік Сарчаев сағат 7.00-де келді. Қалыптасқан дәстүр бойынша, белсенділігі үшін тұрғынға естелікке қойын дәптер сыйладық. Жалпы, біздің №343 сайлау учаскесінде 2357 сайлаушы бар. Алғашында келушілер қатары сирек болғанымен, түс ауа сайлаушылар қатары артты. Белсенділік танытып жатқандар негізінен ересек, орта жастағы адамдар. Сондай-ақ, бұл жолы жасы келген 7 адам өз өтініштері бойынша үйден дауыс берді. Біз үшін ғана емес, бүкіл қала жұртшылығы үшін 107 жастағы Қанша Жақсыбаеваның өз қалауымен сайлау учаскесіне келіп, дауыс бергені айтулы оқиға болды, - дейді №343 сайлау учаскесінің төрайымы Ғалия Әлкенқызы.
Екі ғасырдың куәсі барша қауымға ақ батасын берді. №343 сайлау учаскесі ең қарт сайлаушының иығына шапан жауып, құрмет көрсетті.