Air Astana компаниялары тобы алғаш рет серіктестерін тұрақты даму қағидаттарын іске асыруға қосқан үлесі үшін ESG Awards марапаттарымен атап өтті, деп хабарлайды aqshamnews.kz
Бұл іс-шара серіктестердің экология, әлеуметтік жауапкершілік, корпоративтік басқару саласындағы еңбегін мойындау және ESG қағидаттарын насихаттауға бағытталған.
Марапаттау рәсімінде компания серіктестердің ынтымақтастықтағы ұзақмерзімділігі мен сенімділігін, корпоративтік мақсаттарды қолдауды, бастамашылық пен икемділікті, сондай-ақ ESG қағидаттарын ұстануды жоғары бағалады.
Air Astana компаниялары тобының бас атқарушы директоры Питер Фостер марапаттау рәсімінде:
"Біз ESG құндылықтарын жүзеге асыруда қолдау көрсететін серіктестерімізді мақтан тұтамыз. ESG Awards – бұл біздің ризашылығымыздың нышаны әрі тұрақты болашаққа үлес қосуға шақыруымыз," – деп атап өтті.
Марапатқа ие болған серіктестер қатарында халықаралық және қазақстандық компаниялар бар:
- EY Kazakhstan – климаттық тәуекелдер бойынша кеңес беру;
- SITA – жолаушыларға қызмет көрсету саласындағы инновациялар;
- «Вита Пром» – қауіпті қалдықтарды кәдеге жарату;
- McNair Flight Safety Consulting Inc – авиациялық қауіпсіздікті жақсарту;
- Almaty Catering Services – борттағы қызмет көрсетудің жоғары стандарттары үшін.
Сонымен қатар, қайырымдылық және ресурстарды тиімді пайдалану саласындағы ұйымдар да марапатталды:
- «Аяла» қайырымдылық қоры – әлеуметтік жобаларды қолдағаны үшін;
- «Семей Орманы» және «Павелдің шеберханасы» – жауапты тұтыну мен қайта өңдеу саласындағы бастамалары үшін.
2023 жылы Air Astana компаниялары тобы 2023-2032 жылдарға арналған ESG-стратегиясын іске қосты. Бұл стратегия сапалы білім беру, гендерлік теңдік, экономикалық даму, теңсіздікті азайту және климаттық өзгерістермен күрес сияқты басым бағыттарды қамтиды.
ESG Awards серіктестік қарым-қатынастарды жаңа деңгейге көтеріп, тұрақты даму саласындағы ынтымақтастықты нығайтуға мүмкіндік береді.