Учаскелік сайлау комиссияларының жұмысына кедергі жасамау керек - А.Қалықова.
Бұл туралы Өңірлік коммуникациялар қызметінің алаңында өткен брифингте АСК төрайымы Айгүл Қалықова айтты, деп хабарлайды Almaty-akshamy.kz.
«Учаскелік комиссияның іс-әрекеті заң аясында - олар дауыс беру үшін алған бюллетеньдерді қайта санауға міндетті. Бізде кандидатураларын алып тастаған немесе заң бұзушылықтарға байланысты кері қайтарылған кандидаттардың саны айтарлықтай көп. «Қазақстан Республикасындағы сайлау туралы» заңға сәйкес, Қазақстан Республикасы Орталық сайлау комиссиясының 2018 жылғы 19 қыркүйектегі №16/20 қаулысында бекітілгендей, кандидаттықты алып тастау, кандидатты ұсыну туралы шешімнің күшін жою, кандидаттарды, партиялық тізімдерді тіркеу туралы шешімнің күшін жою туралы істер бойынша сайлау бюллетеньдерін өзгерту қағидалары бекітілді, учаскелік сайлау комиссиялары бұл жұмысты дауыс беру күніне дейін жүргізуге міндетті», - деді А.Қалықова.
Яғни, дауыс беру күні бюллетеньде қалған кандидаттар ғана болуы керек. Бұл Ережеде бюллетеньдерден шығарылатын кандидаттардың аты-жөні қалай алынып тасталатыны нақты сипатталған.
Алматы аумақтық сайлау комиссиясының мәліметінше, 16 наурызға дейін кейбір кандидаттар тіркеуден алынып, сайлауға қатыспайды. Алайда, осы кезге дейін мыңдаған бюллетеньдер басылып шыққан болатын. Сондықтан да бұл күндері учаскелік сайлау комиссияларының мүшелері дауыс беру күніне дайындау үшін бюллетеньдерден олардың мәліметтерін сызып тастауға мәжбүр.
Мәселен, үшінші сайлау округі бойынша Мәжіліс депутаттығына 38 үміткер болса, қазір олардың саны - 30. Бюллетеньдерден сегіз адамның есімін алып тастау керек және бұл алдын ала жасалуы керек. Бесінші округте 34 болды, 24 қалды.
Олар заң аясында жұмыс істейді, дегенмен БАҚ-та дұрыс ақпарат берілмеді, бұл кейбір кандидаттардың сенім білдірілген адамдарының сайлау учаскелеріне келуіне түрткі болды.
Айгүл Қалықова учаскелік сайлау комиссияларының жұмысына кедергі жасамауға шақырды. Олар бүгін және ертеңнен кешіктірмей әрбір бюллетеньнен шығып қалған кандидаттарды сызып тастауға міндетті.
Сондай-ақ, Алматы АСК төрайымы сайлау учаскелерінде партиялық плакаттар ілулі тұрғаны, бірақ бір мандатты кандидаттар туралы ақпарат жоқ деген ақпаратқа қатысты пікір білдірді.
Айгүл Қалықованың айтуынша, барлық ақпараттық плакаттар дайындалған. Ертең, 18 наурыз күні түске дейін олар учаскелік комиссиялардың ақпараттық стендтеріне орналастырылады. Заңға сәйкес, бұл ақпараттық плакаттар белгілі бір уақытқа ілінуі тиіс деген талаптар жоқ. Бұл талап, әсіресе, сайлау күніне қатысты.