Заңгер Айгүл Орынбек айтыскер ақын Айнұр Тұрсынбаеваның қорын тексеруді талап етті, - деп хабарлайды Аqshamnews.kz тілшісі.
Бұл туралы ол әлеуметтік желідегі парақшасында жазды.
"Айдың нұры" қоры дәл Перизаттың қоры сияқты мұқият тексерілуі керек деп талап етемін! Қанды Қаңтар оқиғасының алдында халықтан аямай ақша жиналды. Ал Қаңтардан кейін менің тексерсін деген сұранысыммен кейін артынша қор жабыла салды. Бұл - үлкен күдік тудырады", - дейді ол.
Заңгердің айтуынша, елде саны көп, сапасы жоқ, бақылаусыз қор жетерлік.
"Кейбір әкімдер мен шенеуніктер тіпті кәсіпкерлерден “заңды түрде” ақша жинау үшін арнайы қор ашып алған. Яғни параны айналып өтіп, қор арқылы алады. Қайырымдылықты желеу еткен жалған қорларды жабатын уақыт келді! Мемлекет қарапайым халықтың сенімін пайдаланып, ақша жымқыруға жол беріп отырғандарға нақты шара қолдануға тиіс!" - деді ол.
Еске салайық, айтыскер ақын Айнұр Тұрсынбаева 2020 жылы Aidyn Nury қайырымдылық қорын ашқан еді. Кейін ол Қаңтар оқиғасынан кейін таратылған.
"Бисмиллә деп "Aidyn Nury қайырымдылық қоры" ашылды…Енді осы қор бойынша көп түкірсе көл демекші ай сайын бір отбасына баспана алып беріп отырсақ жақсы ғой… Қайырымдылық-адам жанының нұры…" - деп жазған еді Айнұр Тұрсынбаева 5 жыл бұрын.