Аида Сатыбалдинова кәсіби карьерасында алтыншы жеңісіне қол жеткізді.
Қазақстандық боксшы Аида Сатыбалдинова (5-2-1, 2 КО) Комерсте (АҚШ, Калифорния штаты) титулдық жекпе-жек өткізді, деп жазады Almaty-akshamy.kz Egemen.kz сілтеме жасап.
Ол Гаити аруы Джайка Павилуспен (3-5-1, 1 КО) қолғап түйістірді. Бұл кездесу титулдық сипатқа ие болды. Өйткені GBO нұсқасы бойынша жеңіл салмақтағы чемпионның белбеуі сарапқа салынды әрі ойын алты раундқа есептелген.
Оның қорытындысы бойынша, төрешілердің бір ауыздан қабылдаған шешімімен Сатыбалдинова жеңіске жетті.
Осылайша, Аида Сатыбалдинова кәсіби карьерасында алтыншы жеңісіне қол жеткізіп, GBO нұсқасы бойынша чемпиондық белбеуді ұтып алды. Ал Джайка Павилус алтыншы рет жеңіліс тапты.
Айта кетейік, Аида Сатыбалдинова үшін бұл үш жыл үзілістен кейінгі алғашқы жекпе-жек болды. Ол соңғы рет 2019 жылдың шілдесінде шаршы алаңда өнер көрсеткен.