Ғалымжан Есенов Jusan Bank-тің ірі акционері және Қазақстандағы ең бай бизнесмендердің бірі, ұялы байланыс операторы «Кселл» АҚ акциялар пакетінің бір бөлігін өзінің жеке компаниясына сатқан, деп хабарлайды aqshamnews.kz.
12 қыркүйекте KASE сайтында жарияланған ақпаратқа сәйкес, үш күн бұрын «Кселл» ұялы байланыс операторының акционерлер құрамында өзгерістер болған. Акциялар пакетін Ғалымжан Есенов сатқан, ал оларды KC Holding Ltd жеке компаниясы сатып алған. Бұл мәміле Есенов тобының компаниялары арасындағы акцияларды тиімді бөлу құрылымын оңтайландыру мақсатында жүзеге асырылған. Сондықтан ақырғы бенефициар өзгеріссіз қалды.
«Қазіргі уақытта «Кселл» АҚ акционерлері, компанияның он пайыз және одан жоғары дауыс беретін акцияларына ие: 51%-ы «Қазақтелеком» АҚ-қа, ал 14,87%-ы жеке компания KC Holding Ltd-ке тиесілі. Бұл өзгерістер компанияның операциялық қызметіне әсер етпейді», — делінген KASE хабарламасында.
KC Holding Ltd компаниясы Ғалымжан Есеновке тиесілі, сондықтан іс жүзінде бизнесмен акцияларды өзіне-өзі сатқан болып шығады.