Ұлт ұстазы – Ахмет Байтұрсынұлының Ленинге жазған 3 бірдей хаты табылды.
Бұл туралы Алматыда өткен халықаралық ғылыми-тәжірибелік конференцияға қатысқан отандық ғалымдар мәлімдеді, деп хабарлайды Almaty-akshamy.kz.
Ахмет Байтұрсынұлының 150 жылдығына арналған жиында қоғам қайраткерінің еңбек жолы жайлы шетел және қазақстандық зерттеушілер жазған 12 кітаптың тұсауы кесілді. Ғалым реформатордың Владимир Ленинге жазған хаттары осы кезге дейін көпшілікке беймәлім болған мәліметтерді, тың деректерді зерттеуге сеп болады дейді, жиын қатысушылары.
«Осы үш мақаланың өзінде ғана қоғамдық, әлеуметтік жағдайға деген ұлттық көзқарасын айқын көруге болады. Бүкіл әлемдегі теңдік мәселесі. Большевиктердің келген кездегі ұраны мен оның істері бір-біріне сәйкес келмейтінін Ақаң ашып көрсетеді. Сол кездегі геосаясатты Ақаңның мұрасымен қайта қарауға мүмкіндік туады деп ойлаймын», - дейді М.Әуезов атындағы әдебиет және өнер институтының директоры Кенжехан Матыжанов.