Атом электр станцияларының қауіпсіздік және қоршаған ортаға әсері туралы сұрақтарға байланысты Қазақстан Республикасы Ұлттық ядролық орталығы директорының орынбасары Ерболат Қоянбаев заманауи АЭС реакторларының екі контурлы салқындату жүйесімен жабдықталғанын атап өтті.
"Екі контур гидравликалық тұрғыдан бір-бірінен оқшауланған және тек жылу алмастырғыш арқылы байланысқан. Бұл процесс тұрақты бақылауда болады. Одан бөлек, конденсаторды салқындату үшін қолданылатын су тікелей көлден емес, арнайы прудтан алынады, яғни қоршаған ортаға әсер ету мүмкіндігі барынша азайтылады," – деді Қоянбаев.
Оның айтуынша, екі блокты АЭС жыл сайын дәстүрлі градирендерді пайдаланғанда шамамен 0,063 миллиард текше метр су қажет етеді. Бұл көлемді Қазақстанның ірі өзендері мен су қоймалары оңай қамтамасыз ете алады. Мысалы, Балқаш көлінің көлемі 108 миллиард текше метрді құрайды, ал АЭС-тің жылдық су қажеттілігі Іле өзенінің жылдық нормасының 1%-ын құрайды.
"Сонымен қатар, кейбір жобаларда дәстүрлі градирендердің орнына су шығынын талап етпейтін құрғақ градирендер қолданылады. Бұл шешім су ресурстарын тиімді пайдалануға мүмкіндік береді," – деп қосты Ерболат Қоянбаев.
Бұл мәлімдеме АЭС салу туралы көпшілікті мазалаған экологиялық қауіптерді сейілтуге бағытталған және станцияның қоршаған ортаға әсері ең төменгі деңгейде болатынын көрсетеді. Қазақстанның тұрақты энергетика саласына бағытталған қадамы ұзақ мерзімді перспективада экология мен экономикаға оң әсерін тигізбек.