Күні кеше ғана Президентіміз Жолдауында нақты референдумның күнін белгілеп берді. Әрине, халық өз таңдауын жасай жатар. Бірақ бір нәрсе анық: оңтүстік аймақтарда энергия тапшылығы өте өзекті мәселе.
АЭС салу арқылы бұл тапшылықты жоюдың нақты шешімі қолымызда тұр. Үлкен ауылында 31 көпқабатты тұрғын үй бар. Қазір олардың 22-сінде ғана адамдар тұрып жатыр, қалған үйлер бос тұр.
Көптеген ғимараттар кезінде жекеменшікке өтіп кеткен. Ауылда мектеп пен шағын орталықтан басқа әлеуметтік нысандар жоқ. Онда 300-ге жуық оқушы білім алады. Ауылдық әкімдік қызметкерлері көпқабатты үйлердің бірінде орналасқан 4 бөлмелі пәтерде жұмыс істеуге мәжбүр.
Мәдениет үйі мешітке айналғандықтан, мәдени іс-шаралар мен жиналыстар Үлкен орта мектебінің мәжіліс залында өтеді. Ауылда аурухана жоқ, тұрғындар дәрігерлік көмек алу үшін Ұзынағашқа, Қонаевқа немесе Алматыға баруға мәжбүр, бұл үшін 350-400 шақырымдай жол жүруге тура келеді.
Ауылдағы екі балабақша ғимараты жекенің қолында. АЭС салынады деген әңгіме шыққалы бері Үлкенде жекеменшікке өткен ғимараттар мен пәтерлердің бағасы шарықтап өсіп жатыр.
Жергілікті тұрғындар АЭС салынуы арқылы шалғай ауылдағы әлеуметтік түйткілдер өз шешімін табады деген үлкен үмітте.