Қазақстанда атом электр станциясын (АЭС) салу елдің атом индустриясын дамытуға және тұтастай алғанда экономикаға үлкен мүмкіндік ашады. Бұл туралы "AMANAT" партиясының қолдауымен құрылған Халықтық штабтың өңірлерде өткізіп жатқан түсіндіру жұмыстары барысында айтылды.
Үлбі металлургиялық зауытының бас инженері Игорь Коробейниковтың айтуынша, АЭС-тің жұмысы кез келген басқа жылу электр станциясына ұқсас, тек көмірмен жұмыс істейтін қазандықтың орнына атом реакторы қолданылады.
"АЭС те жылу станциясы сияқты белгілі бір көлемде суды тұтынады. Сондықтан суды пайдалану тұрғысынан бұл басқа жылу станцияларынан ерекшеленбейді," – дейді ол.
Қазақстанда АЭС салу көмірқышқыл газының шығарындыларын 7 миллион тоннаға дейін азайтуға мүмкіндік береді. Сонымен қатар, жаңа жұмыс орындарын құрып, тұрақты және арзан энергиямен 60 жылдан астам қамтамасыз етеді. Бұл еліміздің энергетикалық тәуелсіздігіне қол жеткізудің маңызды қадамы болып табылады.
Халықтық штаб мүшесі Аманбай Нұркенов АЭС салу мәселесі сенімді және экологиялық таза қуат көздеріне деген қажеттіліктен туындағанын атап өтті.
"Бүгінгі таңда еліміздің оңтүстік өңірлерінде электр қуатының тапшылығы байқалуда. Біз көрші елдерден қомақты көлемде электр энергиясын сатып аламыз. Сондықтан АЭС – энергия тапшылығын шешудің негізгі жолы," – дейді Нұркенов.