Қазақстан Республикасы Парламенті Сенатының депутаты Қайрат Тастекеев Бородулиха ауданының тұрғындарымен кездесу өткізді. Кездесуде атом электр станциясын салу мәселесі талқыланды. Кездесуге қатысушылар дамыған елдердің атом энергетикасы саласындағы тәжірибесімен танысып, алдағы референдумның маңыздылығына ерекше тоқталды.
Қайрат Тастекеев АЭС салу – Қазақстанның энергетикалық қауіпсіздігін қамтамасыз етудің негізгі қадамы екенін атап өтті. Атом электр станциясы еліміздегі электр энергиясы тапшылығын азайтып, тұрақты және сенімді энергиямен жабдықтауды қамтамасыз етеді, сондай-ақ ұзақ мерзімді экономикалық пайда әкеледі. Сенатор атом энергетикасын дамыту жоғары технологиялық шешімдерді енгізуге ықпал етіп, отандық ғылым мен білімге де оң әсер ететінін ерекше атап өтті.
"АЭС салу – бұл жай ғана стратегиялық шешім емес, бұл болашақ ұрпақ үшін Қазақстанның алдағы жылдарға тұрақты дамуын қамтамасыз ететін маңызды қадам," – деп атап өтті Қайрат Тастекеев.
Кездесу барысында өңірдің экономикалық дамуы және атом энергетикасының ғылымды қажет ететін технологияларды жедел дамыту жөніндегі мәселелер талқыланды. Республикалық халық штабының мүшелері Қазақстанның әрбір азаматының алдағы референдумға қатысуы елдің болашағы үшін аса маңызды екенін атап өтті. Кездесу белсенді пікір алмасу түрінде өтті, онда тұрғындар жобаның қауіпсіздігі мен экологиялық аспектілеріне қатысты сұрақтарын қойды. Барлық көтерілген сұрақтарға толыққанды жауап берілді.