Мәжіліс Спикері, «AMANAT» партиясының Төрағасы Ерлан Қошанов атом электр станциясының экономиканың, өнеркәсіптің, білімнің және ғылымның дамуына тың серпін беретін аса маңызды жоба екенін ерекше атап өтті. Оның айтуынша, АЭС түрлі тәуекелдердің алдын алып, елімізді қуатты энергетикалық базасы бар прогрессивті мемлекеттердің қатарына қосуға ықпал етеді.
«АЭС салу – бір күннің мәселесі емес. Жобаны іске асыру он жылды, тіпті одан да көп уақытты алуы мүмкін. Сіздердің барлығыңыз да экономикасы дамыған, болашағы зор, қуатты және тәуелсіз Қазақстанда өмір сүргіңіз келетіні сөзсіз. Президентіміз Қасым-Жомарт Тоқаевтың да мақсаты – осы. Қазіргі қолға алынып жатқан барлық істер, ең алдымен, сіздер үшін жасалып жатыр. Ендеше, батыл шешім қабылдайтын уақыт келді. Ал батыл шешімді қабылдайтын – жастар! Олай болса, алдағы референдумда АЭС салуға қолдау білдіріп, өз болашақтарыңыз үшін дұрыс таңдау жасауларыңыз қажет», – деді Ерлан Қошанов жастарға арнаған сөзінде.
Әңгімелесу барысында Халықтық штаб мүшелері АЭС құрылысының жастарға мол мүмкіндік беретінін атап өтті. Атап айтқанда, лайықты жалақысы бар онмыңдаған жаңа жоғары білікті жұмыс орындары ашылады. Қазақстандағы жоғары оқу орындарының түлектері АЭС құрылысына қатысуға және отандық атом индустриясында қызмет етуге барлық мүмкіндікке ие болады.
Болашақта атом энергетикасын дамытудың мемлекеттік бағдарламасы әзірленіп, онда АЭС қажеттілігіне қарай арнайы кадр даярлауға ерекше көңіл бөлінеді.