Сенат депутаттары Сүйіндік Алдашев пен Бекбол Орынбасаров Жаңаөзен қаласы мен Түпқараған ауданында жергілікті тұрғындармен және қоғамдық ұйымдардың өкілдерімен бірқатар кездесулер өткізді.
Бұл кездесулердің негізгі тақырыбы – Қазақстанда атом электр станциясын салудың маңызын түсіндіру болды. Талқылауға мұнай компанияларының еңбек ұжымдары, мәслихат депутаттары, қоғамдық кеңес мүшелері және азаматтық қоғамның белсенді өкілдері қатысты.
Сенаторлар еліміздің тұрақты дамуы үшін АЭС жобасының маңызды рөлін егжей-тегжейлі түсіндірді. Олар атом станциясын салу электр энергиясына деген өсіп келе жатқан сұранысты қанағаттандырудың маңызды қадамы ғана емес, сонымен қатар ұзақ мерзімді экономикалық пайда әкелетінін атап өтті. Жоба жаңа жұмыс орындарын ашуға, инвестиция тартуға және Қазақстан экономикасына жоғары технологиялық шешімдерді енгізуді жеделдетуге мүмкіндік береді. Сонымен қатар, атом энергетикасы отандық ғылым мен технологияның дамуына ықпал етеді, бұл еліміздің халықаралық аренадағы позициясын нығайтады.
Парламентшілер атом станцияларының қауіпсіздігі мәселесіне де тоқталды. Жоба халықаралық қауіпсіздік пен экология стандарттарына толық сәйкес келеді, және табиғи апаттар кезіндегі қауіптерді азайту шаралары қарастырылған. Балама энергия көздері туралы да талқылау жүргізілді, бірақ дәл осы кезеңде Қазақстанға атом энергетикасы ең тиімді шешім болып табылатыны баса айтылды.
Депутаттар барлық тұрғындарды алдағы референдумға белсенді қатысуға шақырды. Ел болашағы үшін маңызды шешім қабылдау кезінде әрбір азаматтың пікірі мен дауысы ерекше маңызды. Кездесуге қатысушылар талқыланған мәселелерге зор ықылас танытып, АЭС құрылысына қолдау білдірді. Жобаның бүкіл еліміз бен өңірдің тұрақты дамуы үшін аса қажеттігі туралы айтылды.