Қазақстанда АЭС салу басқа мемлекеттерге саяси тәуелділікті арттырмайды, керісінше, елдің энергетикалық тәуелсіздігін нығайтуға ықпал етеді. Бұл стратегиялық маңызды жоба Қазақстанға өз энергетикалық ресурстарын дербес басқаруға мүмкіндік беретін сенімді және тұрақты энергиямен қамтамасыз етуге бағытталған.
Жобаның қауіпсіздігін қамтамасыз ету және сыртқы тәуекелдерді азайту мақсатында сенімді халықаралық серіктестермен ынтымақтастық тетіктері мен озық технологияларды енгізу көзделіп отыр. Қазақстан АЭС жобасының ең жоғары стандарттарға сай болуы және ел мүддесіне толық сәйкес келуі үшін қарқынды жұмыс атқаруда.
АЭС – саяси емес, коммерциялық жоба. Серіктес ретінде таңдалатын кез келген компания АЭС салумен айналысады, бірақ оның жұмысына қатыспайды. Қазіргі уақытта Қытай, Корея, Ресей және Франциямен келіссөздер жүргізілуде. Осы елдердің арасынан Қазақстанның қажеттіліктеріне кешенді түрде жауап бере алатын серіктес таңдалады. Сонымен қатар, америкалық (NuScale) және америкалық-жапондық (GE-Hitachi) бірлескен компанияларының төмен қуатты перспективті реакторлары зерттелуде.