Қазақстанда атом электр станциясын (АЭС) салу мәселесіне қатысты алдағы референдум аясында түрлі сұрақтар көтерілуде.
Кейбіреулер «елдегі энергия жеткілікті, тапшылық жоқ» деп санайды. Алайда, Энергетика министрлігінің болжамы бойынша 2030 жылға қарай елімізде электр энергиясының тапшылығы туындауы мүмкін. Бұл тапшылық шамамен 6,2 гигаваттты құрайды, ал өндірілетін және тұтынылатын энергия арасындағы айырмашылық 13,5 миллиард киловатт-сағатқа жетуі мүмкін.
Бүгінгі таңда Қазақстан электр энергиясының қажеттілігін қанағаттандыру үшін көрші елдерден энергия импорттауда. Оның көлемі 1,2 миллиард киловатт-сағат. Сонымен қатар, көптеген электр станцияларының жабдықтары тозған, кейбірі 90%-ға дейін ескірген. Осы себепті АЭС салу қажеттілігі туындауда, бұл — елдің энергетикалық тәуелсіздігі үшін маңызды қадам.
Қазіргі кезде көмірден алынатын энергияны көбейту қиынға соғуда, себебі халықаралық қаржы ұйымдары көмір электр станцияларын салуға қаржы бөлгісі келмейді. Газ станцияларын салу да мүмкін емес, өйткені Қазақстанда қажетті газ қоры жеткіліксіз. Осы себептен атом электр станциясы ең қолайлы балама болып саналады.
Еуропалық Одақ «лас» энергияны пайдаланатын өндірістерге арнайы карбон салығын енгізуді жоспарлап отыр. Бұл дегеніміз, егер біздің зауыттар көмірден алынатын энергияны пайдаланса, олардың өнімдері Еуропада қымбаттауы мүмкін. Бұл қазақстандық тауарлардың бәсекеге қабілеттілігін төмендетеді. Сондықтан біздің кәсіпорындарды таза энергиямен қамтамасыз ету арқылы оларды халықаралық нарықта бәсекеге қабілетті етуіміз қажет.
Атом энергетикасы — еліміздің энергия қажеттілігін тұрақты қамтамасыз етудің және экономиканы дамытудың ең тиімді шешімі. АЭС салу Қазақстанның энергетикалық болашағын қамтамасыз етуге және тәуелсіздікті нығайтуға мүмкіндік береді. Климатты қорғау және көміртек шығарындыларын нөлге жеткізу атом энергетикасынсыз мүмкін емес.