Халықтық штаб Алматы облысының тұрғындарын АЭС салуға дауыс беруге шақырды
Қонаев қаласында Халықтық штаб мүшелері Алматы облысының тұрғындарымен кездесу өткізді. Іс-шараға зиялы қауым өкілдері, ардагерлер, дәрігерлер, педагогтар және жастар қатысты.
Сенат Спикері Мәулен Әшімбаев Президенттің АЭС салу туралы референдум өткізу бастамасының маңыздылығына тоқталып, бұл қадам «Халық үніне құлақ асатын мемлекет» тұжырымдамасының көрінісі екенін атап өтті.
Алматы облысы Ардагерлер кеңесінің төрағасы Ерболат Тұрымбетов ардагерлер қауымы референдумды қолдайтынын жеткізді. Медицина ғылымдарының докторы Зинаш Күштекова АЭС-тің қауіпсіздік стандарттарына сәйкес келетінін, ал оның радиациялық әсері өте төмен екенін айтты. Сарапшы Григорий Мерисов АЭС-тің экономикалық пайдасын, көмірқышқыл газын азайтуға ықпал ететінін атап өтті.
Кездесуде АЭС салу елдің энергетикалық тәуелсіздігін нығайтып, тұрақты даму мен экономикалық өсуге жол ашатыны айтылды. Халықтық штаб мүшелері тұрғындарды референдумға белсенді қатысуға шақырды.