Satbayev University қауымдастырылған профессоры Инеш Кенжина атом энергетикасын Қазақстанның энергетикалық құрылымына енгізу арқылы елдің СО2 шығарындыларын айтарлықтай азайтуға және Париж келісімі бойынша халықаралық міндеттемелерді орындауға мүмкіндік беретініне сенімді екенін айтты, деп хабарлайды aqshamnews.kz
– Энергетика құрылымын осылайша әртараптандыру электр энергиясын тұтыну көлемінде көмір генерациясының үлесін айтарлықтай азайтады. Бұл тек жаңартылатын энергия көздері мен газ генерациясы арқылы ғана емес, сонымен қатар атом генерациясының арқасында жүзеге асады. Мұның барлығы экологиялық тұрғыдан үлкен әсер береді, – деп мәлімдеді Инеш Кенжина.
Сарапшының пікірінше, АЭС енгізу елдің энергетикалық тәуелсіздігін арттырып, халықаралық экологиялық талаптарға сай болуға мүмкіндік береді. Қазіргі таңда әлемнің көптеген елдері, соның ішінде Франция, Канада және Жапония, атом энергетикасын қолдану арқылы өздерінің көміртек іздерін қысқартуда. Қазақстанда да осы жолмен жүру арқылы көміртек бейтараптылығына жетуге ықпал ететін маңызды қадам жасалады.
Инеш Кенжинаның айтуынша, Қазақстан 2060 жылға дейінгі көміртек бейтараптығы бойынша өз стратегиясын жүзеге асыруда, ал атом энергетикасы бұл мақсатқа жетудің басты факторларының бірі болмақ. Сонымен қатар, жаңартылатын энергия көздерімен бірге атом энергиясы елдің энергия жүйесін тұрақты әрі сенімді етеді.
– Қазақстанның табиғи ресурстарға бай болуы, соның ішінде уран қорының молдығы, өзіміздің атом электр станцияларын дамытуға және энергияны экспорттау әлеуетін арттыруға мүмкіндік береді, – деп атап өтті Кенжина.