Қазақстандық ғалым Медеу Әбішев атом электр станциясын салу идеясын белсенді түрде қолдайды, деп хабарлайды aqshamnews.kz
Профессордың пікірінше, бұл жобаны жүзеге асыру Қазақстанды алға жылжытатын катализаторға айналады, экономиканың және ғылымның дамуына серпін береді. Ол атом электр станциясы білікті мамандарды дайындауға және жаңа жұмыс орындарын ашуға көмектесетініне сенімді. Сонымен қатар, бұл жоба қазақстандықтарға заман талабына сай жаңа технологияларды игеріп, дамудың заманауи жолдарын меңгеруге мүмкіндік ашады.
Медеу Әбішевтің пікірінше, АЭС тек қана энергетикалық қажеттіліктерді қанағаттандырып қоймай, еліміздің технологиялық және ғылыми әлеуетін арттыруда маңызды рөл атқарады. АЭС құрылысы елдегі энергия тапшылығын шешуге көмектесіп қана қоймай, өндірісті әртараптандырудың және жаңартылатын энергия көздерін дамытудың негізгі қадамы болмақ.