Көпшілік жұрт атом реакторларын қауіпті деп ойлайды. Іс жүзінде атом электр станциялары, әсіресе, Қазақстанға ұсынылып отырған су-сулы энергетикалық реакторлар әлемдегі ең қауіпсіз реакторлар болып есептеледі. Қазіргі таңда әлемде 415 реактор жұмыс істеп тұрса, соның 250-ге жуығы осы су-сулы реакторлар. Оның үстіне қазіргі 3+ ұрпақтағы АЭС-терде активті және пассивті өзара бірін-бірі қайталайтын қауіпсіздік жүйелері бар. Ғылыми есептер бойынша белсенді аймақтарда АЭС-терде қандай да бір ауыр апаттың болуы ықтималдығы өте төмен. Айталық, 10 миллион жылда бір рет деп есептеледі, бұл өте төмен ықтималдылық.
Сонымен қатар, қарапайым азаматтар арасында АЭС болған жерде одан кемінде 50 шақырым аумақта өмір сүруге болмайды, радиация тарайды деген қате түсінік бар. Шын мәнінде, қазіргі заманғы 3+ ұрпақ атом реакторларындағы санитарлық қорғау аймағы тек АЭС алаңымен ғана шектеледі. Яғни, АЭС аумағынан 3 шақырымнан тысқары аумақ радиациялық қауіпті аймақ болып саналмайды.
Егер алдағы референдум оң шешімін тауып жатса, АЭС салу елімізге үлкен мультипликативті әсер береді. Бұл дегеніміз елімізге жаңа, бұрын болмаған ауқымды ядролық технологияның келуі. Бұл – Қазақстанды әлемдегі ядролық технологиясы бар 32 елдің қатарына қоспақ. Сонымен қатар, АЭС-тің 10–12 жылдық құрылыс барысында 8000–10000 адамға дейін жұмыспен қамти алады, әрі бүкіл жоба барысында 2-3 млрд АҚШ доллары салық ретінде елімізге түседі. Жоба аяқталғаннан кейін де 2 мыңға жуық тұрақты жұмыс орны пайда болады.
АЭС елдің инвестициялық тартымдылығына үлкен әсерін береді. Көпке мәлім, ірі инвесторлардың басты талаптары қашанда тұрақты энергия көзі. АЭС бұл талаптың сенімді кепілі бола алады және экологиялық тұрғыда барлық талаптарды қанағаттандырады.
Әрине, еліміздің энергетикалық тәуелсіздігі тұрғысынан да көптеген тиімділіктерін айтуға болады. АЭС ең алдымен тұрақты энергия көзі болғандықтан, бұл өндіріс пен тұрмыс үшін маңызды. Қазір Қазақстан 2,6 млрд КВт/сағат электр энергиясын көрші елдерден импорттап отыр. Электр энергиясына деген тапшылық халық санының, экономика мен өндіріс орындарының ұлғаюына байланысты жыл сайын өсе беретін болады. Көмірмен жұмыс істеп тұрған станцияларымыздың 70 пайызы тозған. Егер біз тұрақты генерация көзін жасамасақ, бұл түбі экономикамызға кері әсерін тигізеді.