АЭС салуды қолдау жөніндегі Халықтық штаб мүшелері Астана қаласындағы кәсіподақ қызметкерлерімен кездесу өткізді. Кездесуге «Қазақстандық атом электр станциялары» ЖШС Атом энергетикасы бөлімінің жетекші инженері Асуан Сиябеков және ҚР Кәсіподақтар федерациясы төрағасының орынбасары Нұрлан Өтешев қатысты, деп хабарлайды aqshamnews.kz
Нұрлан Өтешев климаттың өзгеруі мен экологиялық жағдайдың нашарлауы мәселелеріне тоқталып, «жасыл» энергияға көшудің маңыздылығын атап өтті. Ол АЭС-тің жұмысшылардың және халықтың жағдайын жақсартуда үлкен мүмкіндіктері бар екенін баса айтты.
Асуан Сиябеков еліміздегі энергожүйенің қазіргі жағдайы мен АЭС салудың қажеттілігі туралы толыққанды ақпарат берді. Қазақстанның жылу электр стансаларының 70-80%-ы тозған, ал кейбір қалаларда бұл көрсеткіш 90%-ға жетіп отыр. Осыған байланысты жаңа энергия көздерін іске қосу қажеттігі туындауда.
Сонымен қатар, ол Қазақстанда 148 жаңартылатын энергия көздерінің нысаны жұмыс істеп тұрғанын айтты. Бірақ күн мен жел энергиясы ауа райына тәуелді болғандықтан, олардың тиімділігі төмен. АЭС-тің тиімділігі жоғары, 90%-ды құрайды, ал жел және күн электр станцияларының көрсеткіші айтарлықтай төмен – сәйкесінше 33-35% және 18%.
АЭС салу жерді үнемдеуге де мүмкіндік береді. Мысалы, 2,8 ГВт энергия алу үшін 8 ГВт-тық жел электр стансасы 4 мың гектарды, ал күн электр стансасы 28 мың гектар аумақты қажет етеді. Бұл дегеніміз, АЭС-тің тиімділігі жағынан әлдеқайда басым екендігін көрсетеді.
Қазақстанның уран өндірісі бойынша әлемдегі алдыңғы қатарлы ел екенін ескере отырып, Сиябеков атом энергетикасына көшудің қолайлы мүмкіндіктерін атады. Қазақстанда уран шикізаты жеткілікті және оны тиімді пайдалану керек.
Кездесу соңында кәсіподақ өкілдері АЭС салу бастамасын қолдады.