Дәрігерлер АЭС салудың экологиялық жағдайды жақсартуға ықпал ететініне қызығушылық танытты, себебі ұлт саулығы үшін өндірістен зиянды заттардың аз бөлінуі маңызды.
Мұндай пікір алмасу Ақтөбе облысындағы Мәртөк аудандық Халықтық штабтың аудандық орталық аурухана ұжымымен кездесуінде өрбіді.
Штаб мүшесі Қыдырбай Шудабаевтың айтуынша, атом электр стансалары қоршаған ортаны түтін газдары, күл және мұнай өнімдерімен ластамайтындығы сарапшы мамандардың дәлелді пікірлері арқылы расталған. Ол әлемдегі дамыған және дамушы елдердің АЭС пайдалану тәжірибесін мысалға келтірді.
AMANAT партиясының Мәртөк аудандық филиалы төрағасы Ануар Искарин энергетика мамандарының ядролық энергияны «жасыл» деп танитынын атап өтті. Оның сөзінше, АЭС көмір және газ стансаларымен салыстырғанда айтарлықтай аз зиянды шығарындыларға ие және экологиялық жағынан таза энергия көзі болып табылады.
Кездесуде сонымен қатар ауданның электр энергиясына байланысты мәселелері де көтерілді. Ануар Искариннің айтуынша, Мәртөк ауданында электр желілерінің 80 пайызының тозуы себепті ауа райының қолайсыздығы кезінде жиі жарық өшеді. Бұл жағдайды түзету үшін қомақты қаражат қажет, ал қазір еліміз 100 млрд теңгеден астам қаражатқа өзге елдерден энергия сатып алуда. Электр энергиясын тұтыну көлемінің жыл сайын артып келе жатқанын да ескерген жөн.