Мемлекет басшысының тапсырмасына сәйкес «Адал азамат» біртұтас тәрбие бағдарламасы меншік түріне қарамастан, барлық білім беру ұйымдарына енгізіледі.
Ол туралы бүгін Орталық коммуникациялар қызметінде өткен дөңгелек үстелде оқу-ағарту вице-министрі Еділ Оспан айтты, деп хабарлайды aqshamnews.kz Оқу-ағарту министрлігіне сілтеме жасап.
Бағдарламаны дамыту бірнеше кезеңді қамтиды. 2025 жылы Бағдарлама аясында барлық қатысушыларды тартып, жекеменшік мектептермен жұмыс күшейтіледі. 2026 жылы Бағдарламаны қоғамға кеңінен тарату үшін пәрменді шаралар қабылданатын болады. Сондай-ақ «Адал азамат» тұжырымдамасының құндылықтарын ескере отырып, мектептердің бірыңғай дизайн-коды әзірленеді.
«Бүгінде барлық мемлекеттік білім беру ұйымдарында біртұтас білім беру бағдарламасы сәтті жүзеге асырылуда. IV Ұлттық құрылтайда Мемлекет басшысы бұл бастаманың жалпыұлттық сипат алуы керектігін айтты. Осыған байланысты біз жеке білім беру ұйымдарында тәрбие бағдарламасын енгізу жұмысын жалғастырамыз. «Адал азамат» біртұтас тәрбие бағдарламасы барлық балаларды қамтитын және жалпыұлттық сипаттағы, стратегиялық мәні бар ұзақ мерзімді құжат», – деді Еділ Оспан.
«Адал азамат» біртұтас тәрбие бағдарламасы тек қана білім беру ұйымдарындағы ғана емес, барлық мемлекеттік ұйымдардағы тәрбие жұмысына қатысты іс-қимылдың негізіне айналады. Оқу-ағарту министрлігі білім беру ұйымдарында мемлекеттік органдар жүзеге асыратын іс-шараларды біртұтас тәрбие бағдарламасы аясында біріздендіруді жүргізеді. Бұл тәсіл оқушылардың бойында ұлттық және азаматтық құндылықтарды дамытуға бағытталған тәрбие жұмысының біртұтас жүйесін құруға мүмкіндік береді.