Алматы қаласында мерейтой қарсаңында «Abay Plaza» атты жаңа сауда орталығы өз есігін айқара ашты.
Жаңа сауда кешені Абай даңғылы мен Алтынсарин көшесінің қиылысында, «Тигрохауд» кешенінің жанында орналасқан. Сауда орталығының ашылуына Әуезов ауданының әкімдігі мен Алматы қаласының кәсіпкерлік басқармасының өкілдері және тұрғындар қатысты.
Ғимаратта әртүрлі тұтыну тауарлары, соның ішінде еуропалық өндірушілердің киімдері ұсынылған заманауи сауда орындары орналасқан. Сондай-ақ, келушілерге арналған мейрамхана кешені, қоғамдық тамақтану орындары мен сұлулық салондары жұмыс істейді.
«Тигрохауд» ЖШС бас директоры Азамат Шагитовтың айтуынша, «Abay Plaza» сауда орталығының құрылысы 2024 жылдың сәуір айында басталып, жоспарға сәйкес аяқталған. Құрылысты жүзеге асыруға Алматы қаласының кәсіпкерлік басқармасы мен Әуезов ауданының әкімдігі қолдау көрсеткен. Сонымен қатар, «Almaty Finance» тарапынан инвестициялық қолдау көрсетілген. Қазіргі уақытта «Abay Plaza» кешенінде 50-ден астам сауда нүктесі жұмыс істейді.
Аталған нысан – тек заманауи архитектуралық шешім емес, ұлттық рух пен төл мәдениеттің үйлесім тапқан кеңістігі. «Abay Plaza» – сән-салтанаты келіскен сауда, қоғамдық және зияткерлік орын, әрі қазақ халқының мәдени коды мен болмысын заманауи форматта ұсынатын ерекше кеңістік. Ғимараттың ішкі және сыртқы көрінісі мен безендіруінде Абай дәуірінің бояуы, қазақы өрнек, ұлттық нақыш кеңінен қолданылған. Кілем мен кесте элементтері, киіз үй формасындағы шағын демалыс аймақтары келушіге рухани әсер сыйлап, ұлттың өткені мен бүгінін байланыстырады.
Ашылу рәсімінен ерекше әсер алған қонақ Сәуле Батырбекова:
– Абай – тек өткеннің емес, бүгін мен болашақтың да шамшырағы. Бұл орталықтың ашылуы – оның мұрасын ұлықтап, ұрпақ санасына жеткізу жолындағы үлкен қадамдардың бірі. Абай Құнанбайұлының «Толық адам» тұжырымдамасы, адамгершілік пен білімге негізделген ілімі – орталықтың идеялық өзегіне айналмақ.
Бұл – тек бір ғимарат емес, ұлт санасына ой салар, жастарға бағыт-бағдар берер, руханиятты тірілтер жаңа кеңістік боларына сенемін», – деп атап өтті.
Ұлы Абайдың туған күнінде осындай игі істің жүзеге асуы – елдің рухани жаңғыру жолындағы нақты қадамы. «Abay plaza» – зияткерлік кеңістік пен мәдени құндылықтар үйлесім тапқан орталыққа айналары сөзсіз.