2024 жылдың 4 мамырында еліміздің жетекші педагогикалық жоғары оқу орны – Абай университетінде Ашық есік күні өтті.
Іс-шараға Алматыдан және еліміздің басқа да өңірлерінен келген талапкерлер мен олардың ата-аналары қатысты, деп хабарлайды аlmaty-akshamy.kz.
Шараның негізгі мақсаты – болашақ студенттерге университет атмосферасына енуге, оның білім беру бағдарламаларымен, инфрақұрылымымен және студенттік өмірімен танысуға мүмкіндік беру болды. Іс-шараға қатысушылар Қазақстандағы педагогикалық білім беру флагманы туралы маңызды ақпарат алып, университеттің білім беру саласындағы қызметімен танысты. Бакалавриат, магистратура және докторантураға арналған білім беру бағдарламалары және университет студенттерінің кәсіби қабілеттерін шыңдаудың бірегей мүмкіндіктері ұсынылды.
Ашық есік күні болашақ студенттерге университеттің академиялық және мансаптық мақсаттарына қаншалықты сәйкес келетінін түсінуге қолайлы жағдай жасалды. Әлемдік стандарттарға сай мамандар даярлауға бағытталған 180-нен астам білім беру бағдарламалары, сонымен қатар қос диплом және академиялық ұтқырлық бағдарламалары білім берудің әр кезеңінде білім алушылардың кәсіби білімін шыңдап, олардың мансап жолындағы қажетті дағдыларын дамытуға ықпал етеді.
Абай университеті білім берудің жоғары стандарттарымен және оқытудың озық әдістемелерімен ерекшеленеді, белсенді ғылыми зерттеулері мен инновациялық тәсілдері бар зияткерлік орталық болып табылады. Халықаралық стандарттар мен еңбек нарығының талаптарына жауап беретін жаңа формациядағы педагогикалық кадрларды даярлайды. Сонымен қатар, университет еліміздің түкпір-түкпірінен келген мұғалімдердің біліктілігін арттыру және қайта даярлау жұмыстарын белсенді жүргізуде.
Іс-шара соңында қатысушылар университет қызметі, мамандық таңдау тәсілдері, сондай-ақ жұмысқа орналасу перспективалары туралы ақпараттық жұмысты жоғары бағалады. Ашық есік күні жоғары деңгейде өтті. Университет өкілдері талапкерлер мен олардың ата-аналарының сұрақтарына егжей-тегжейлі жауап беріп, студенттік өмір мен білім беру бағдарламалары туралы маңызды ақпараттармен бөлісті.