Абай облысында «Таза Қазақстан» республикалық акциясы аясында қоғамдық және экологиялық тәртіпті қамтамасыз ету жұмыстары жүргізілуде.
Полиция қызметкерлері жылдың басынан бері 7 818 құқық бұзушылықты анықтады. Оның ішінде 2 492 жағдай – ортақ қолданыстағы орындарды ластаумен, 5 326 дерек – қалалар мен елді мекендердің аумақтарын абаттандыру ережелерін бұзумен, жасыл желектерді бүлдірумен байланысты.
Барлық заңбұзушылықтар бойынша тиісті шаралар қабылданып, кінәлілер жауапкершілікке тартылды. Сонымен бірге, полиция профилактикалық жұмыстарды күшейтіп, тұрғындар арасында түсіндіру шараларын жүргізуде. Жергілікті атқарушы органдар, қоғамдық ұйымдар мен еріктілермен бірлесіп, кездесулер, сенбіліктер және ақпараттық акциялар ұйымдастырылуда.
«Таза Қазақстан» – тек экологиялық бастама емес, әрбір азаматтың санасында табиғатты қорғау мен тәртіпке жауапкершілік сезімін қалыптастыруға бағытталған қадам.