Абай мерейтойы аясында үш іргелі еңбек жарық көрді, - деп хабарлайды Аqshamnews.kz тілшісі.
Ұлы ақын Абайдың 180 жылдығы аясында бес туынды жарық көрді. Кітаптар Ақберен Елгезектің "Абай" баспасынан жарық көрген, тұсауы 9 тамызда Семейдегі Шәкәрім университетінде өткен "Адамзаттың Абайы: Руханият, парасат, таным" халықаралық ғылыми-тәжірибелік конференциясының аясында кесілген.
"Абайдың аударма мектебі" атты ғылыми еңбекте қазақтың кәсіби көркем аудармасының бастауы, жалғыз өзі тұтас бір әлем жасап, шығармашылықпен айналысқан небәрі жиырма жылдың ішінде қазақтың тілін де, көркемдік, этикалық танымын да күрт өзгертіп, бұрын-соңды түрік жұрты жетпеген биікке көтерген Абайдан тағылым алған Шәкерім Құдайбердіұлы, Әсет Найманбайұлы, Уәйіс Шондыбайұлы, Тұрағұл Абайұлы, Даниял Ысқақовтардың көркем аудармаларына ғылыми тұрғыда теориялық, текстологиялық талдау жасалған. Шәкерім, Тұрағұл, Даниялдың өмірлеріне, қоғамдық қызметтеріне қатысты архивте сақталған тың деректер мен түпнұсқа қолжазбалар берілген.
"Даниял Ысқақов шығармалары" жинағы – қазақтан шыққан тұңғыш қаржыгер, ағартушы, аудармашының әдеби мұрасын тұтас қамтыған алғашқы басылым. Ол – Кәкітай Ысқақовтың ұлы, Абайдың тұңғыш жинағын Санкт-Петербургтен Шыңғыстауға жеткізген тұлға.
Үшінші еңбек – "Шейіт" кітабы. Мұнда ұлы гуманист, ойшыл Шәкерім Құдайбердіұлының өмірінің соңғы кезеңі, қазаға ұшырауы, оған қатысты мұрағат деректері мен естеліктер салыстырмалы зерттеу арқылы берілген.
Ал "Халиолла" атты кітаптың авторы - Әсет Медеуханұлы. Ал Ахат Шаһкәрімұлының "Жалынға малған жүрегін" кітабын құрастыруға ақын Мерей Қарт және Жаңыл Әділбекқызы атсалысқан.