Алматыда «Ұлы Жібек Жолы» балетінің премьерасы өтті.
Абай атындағы Қазақ ұлттық опера және балет театрында көрермен көп жиналды. Жоғары классикалық өнерді бағалайтын алматылықтар мен қала қонақтары Әйгерім Еркебаеваның музыкасымен қойылған екі бөлімді «Ұлы Жібек жолы» балетін тамашалауға келді. Премьераның идеясы, либреттосы мен хореографиясы Қазақстанның халық артисі Гүлжан Түткібаеванікі.
Қойылым философиялық притча мен заманауи метафораны тоғыстырады: спектакль суық цифрлық болашақта, адамдар бір-бірінен оқшауланған әлемде басталады.
Жай ғана керуенді көрсету заманауи көрерменге қызық емес. Бұл жерде өз концепцияңды табу маңызды. Мен Жібек жолы дәуіріне алыс болашақтың призмасы арқылы қарауды жөн көрдім, — дейді Гүлжан Түткібаева.
Оның айтуынша, балет дәстүрдің құндылығы мен адам жүрегінің жылуы туралы ой қозғайды.
Нағыз сезімдерді сақтап қалған Жігіт заманы өткен Қартқа жолығады. Қарт оны өткен шаққа — жанданып тұрған Шығыс әлеміне жетелейді: керуен-сарай, базар, саудагерлер тіршілігі. Осы жерде ол пәктік символы — Аксұнқар қызды кездестіреді. Алайда қиял-елес бейнесіндегі айнашы көпес қызды ұрлап әкетеді.
Екінші актіде кейіпкер сын-қатерлерден өтіп, нәпсі мен арбаулармен күресіп, ішкі жарығын табады. Ол антагонисті жеңгенімен, Ақсұнкар жоғалып кетеді, тек сәулесі ғана қалады. Болашақ мегаполисіне оралған Жігіт өткеннің нұрын адамдарға әкеледі — қала да біртіндеп жандана бастайды.
Ақсұнкар партиясының орындаушысы Жанель Түкеева өз кейіпкері туралы ой бөлісті:
Бұл — жарық, жас әрі нәзік қыздың бейнесі. Жігіт оны билік, байлық, азғырулардан өтіп іздейді. Ол қыздың жанын құтқарғанымен, кеш қалады. Соған қарамастан, өз заманына адамгершілікті қайтарады. Балеринаның айтуынша, жоба оның жүрегіне жақын болған.
– Мен бұл жұмысқа идеяның туу сәтінен бастап қатыстым, — деді ол.
Премьера дәстүр мен заманауилықты тоғыстырған жарқын мәдени оқиғаға айналды.