Алматыда өткен республикалық референдумға «Мерейлі отбасы» байқауының әр жылдардағы жеңімпаздары саналатын еңбек әулеттерінің өкілдері де қатысып, дауыс берді. Олардың қатарында Дүйсебаевтар отбасы мен теміржолшылар әулеті – Қапышевтар бар, – деп хабарлайды aqshamnews.kz тілшісі.
Қапышевтар — үш буыннан тұратын, 26 адамнан құралған үлкен отбасы. Әулет мүшелерінің теміржол саласындағы жалпы еңбек өтілі 826 жыл. Отбасының еңбек жолы 1932 жылы теміржолда жұмыс бастаған Мұрат Қапышевтан бастау алған. Кейін оның балалары мен немерелері де осы саланы таңдап, отбасылық дәстүрді жалғастырып келеді.
Ал Дүйсебаевтар әулеті педагогикалық дәстүрімен танымал. Бұл отбасының төрт буыны білім беру саласында еңбек етіп келеді. 40 жыл ұстаздық қызмет атқарған Ұлбосын Дүйсебаева тоғыз бала тәрбиелеп өсірген. Балаларының көпшілігі мұғалім мамандығын таңдаса, үш немересі де осы жолды жалғастырып келеді.
Отбасы мүшелері референдумға қатысудың маңызын ерекше атап өтті.
«Әрбір дауыс – -өзіміз таңдаған болашаққа жасалған қадам», — деді Дүйсебаевтар әулетінің өкілдері.
«Референдум елді жақсарту жолындағы ортақ ұмтылыста бізді біріктіретін маңызды қадам», — деді Қапышевтар әулетінің өкілдері.
Учаскеге бүкіл отбасымен келген әулет өкілдері қоғамдық өмірге белсенді араласудың және отбасылық дәстүрге құрметтің үлгісін көрсетті.