8 сәуірде Қазақстанның бірқатар өңірінде ауа райы күрт құбылып, жаңбыр жауып, найзағай ойнап, жел күшейеді. Синоптиктер Астана, Алматы, Шымкент қалаларында және елдің 16 өңірінде дауылды ескерту жариялады, – деп хабарлайды aqshamnews.kz тілшісі.
Осыған байланысты синоптиктер Астана, Алматы, Шымкент қалалары мен 16 өңірде дауылды ескерту жариялады.
Астанада жаңбыр жауып, күндіз найзағай болады. Желдің екпіні секундына 15 метрге дейін жетеді.
Ақмола, Солтүстік Қазақстан, Қостанай, Павлодар, Қарағанды, Ұлытау, Шығыс Қазақстан және Абай облыстарында жаңбыр, тұман, найзағай және екпінді жел күтіледі. Кей аймақтарда желдің жылдамдығы 15–20 м/с дейін күшейеді. Қарағанды мен Абай облыстарының оңтүстігінде жоғары өрт қаупі сақталады.
Алматы облысында, сондай-ақ Алматы қаласы мен Қонаевта жоғары өрт қаупі сақталып отыр. Өңірдің таулы аумақтарында найзағай ойнап, жел күшейеді.
Жамбыл, Түркістан, Қызылорда облыстары мен Шымкентте де ауа райы тұрақсыз болады. Кей жерлерде қатты жаңбыр жауып, найзағай, бұршақ, дауыл және қатты жел болжанып отыр. Шымкент пен Түркістанда жоғары өрт қаупі де сақталады.
Сонымен қатар Ақтөбе, Атырау, Маңғыстау және Батыс Қазақстан облыстарында да найзағай, тұман және екпінді жел күтіледі.
Синоптиктер тұрғындарға ауа райының күрт өзгеруіне байланысты сақтық шараларын ұстануға кеңес береді.