Ақтөбе облысында Қаржы мониторингі агенттігінің өңірлік департаменті мен прокуратураның үйлестіруімен жалған құжаттар арқылы жүк көліктерін заңсыз тіркеп келген ұйымдасқан қылмыстық топтың жолы кесілді, - деп хабарлайды Аqshamnews.kz тілшісі.
Тергеу деректеріне сәйкес, топ мүшелері қолдан жасалған сатып алу-сату шарттарын және көлік құралдарын тексеру актілерін пайдаланып, "Автоіздеу" ақпараттық жүйесіне шындыққа жанаспайтын мәліметтер енгізген. Соның нәтижесінде 77 жүк көлігі бастапқы тіркеуден заңсыз өткізілген.
Бұл әрекеттер Ақтөбе, Атырау және Батыс Қазақстан облыстарының аумағында салық заңнамасындағы рәсімдерді әдейі айналып өту мақсатында жүзеге асқан. Тіркеу алымдарын төлемеу арқылы мемлекетке 740 миллион теңгеден астам залал келтірілген.
Қазір қылмыстық топтың ұйымдастырушылары сот шешімімен қамауға алынды. Іс бойынша соталды тергеп-тексеру жалғасып жатыр.
ҚР Қылмыстық-процестік кодексінің 201-бабына сәйкес, тергеу мүддесіне байланысты өзге ақпарат әзірге жария етілмейді.