Әкімдіктердің баспана кезегі толығымен Отбасы банкіне ауыстырылды, деп хабарлайды aqshamnews.kz
Өнеркәсіп және құрылыс министрі Ерсайын Нағаспаев баспана кезегіне тағы 70 мың адамның қосылғанын мәлімдеді.
Биылдан бастап әкімдіктердің баспана кезегі толығымен Отбасы банкіне ауыстырылды. Жақында кезекке тұратын арнайы сайт іске қосылған болатын.
Өнеркәсіп және құрылыс министрі Ерсайын Нағаспаевтың айтуынша, жаңадан қосылған сайтқа 170 мың өтініш түскен.
"24 мамырдан бастап жаңа ережелер күшіне енді. Енді баспана кезегін Отбасы банк жүргізеді. 24 мамырдан бері бірнеше күн ғана өтті. Мендегі шұғыл ақпаратқа сәйкес, осы уақыттың ішінде шамамен 170 өтініш түскен. Соның ішінен 70 мың адам баспана кезегіне қойылды", - деді Нағаспаев.
Осылайша, бұған дейін болған 650 мың адамға баспанаға мұқтаж тағы 70 мың адам қосылды.
Баспанаға мұқтаж кез келген адам кезекке тұра алады. Бірақ нақты талаптар бар. Олар:
соңғы 5 жыл ішінде ҚР аумағында тұрғын үйдің болмауы;
жалғыз баспананың апатты деп танылуы;
Астана, Алматы және Шымкент қалалары үшін қосымша соңғы 3 жыл ішінде тіркеудің болуы.