Аста-төк той жасап, туған күніне 600 мың теңгеге торт жасатқан блогер Аселина Батыр кондитерге ақшасын әлі бермеген. Өйткені кондитер қойған бағасы көңілінен шықпаған. Заңгердің айтуынша, бағасы да алдын ала келісілмеген көрінеді, - деп хабарлайды Аqshamnews.kz тілшісі "КТК" телеарнасына сілтеме жасап.
"Жоқ, сол кезде де мүлдем баға айтылған жоқ. Түсінесіз бе, мүлдем айтылған жоқ. Той боп жатқан уақытта тортты тапсырды. Алдын ала әкелген жоқ, 18 шілдеден бастап 3 тамызға дейін мүлдем айтпады. Әсел бірнеше рет сұрады. Баға қанша болады деп. Өйткені менде есеп бар, ондай да болған жоқ", - дейді заңгер Ғазиза Әмірбек.
Құрақ көрпе тігумен танылған Аселина Батыр туған күніне тапсырыс берген тәттіге алдын ала 100 мың теңге көлемінде төлем жасаған екен. Ал нақты бағасын білмеген. Адвокат нарықтағы соманы ғана береміз дейді. Алайда кондитер Нұршат Ақбергенова тапсырыс берушінің бұл пікірімен келіспейді. Оның айтуынша, барлық қоспасы қымбат, шығынның бәрін өз қалтасынан шығарған. Жастық пішінді тортты жеп алған соң, тұтынушының дау шығарып отырғанына ренжулі. Салмағы 18 келі тартатын бұл жұмыстың тым арзан бағаланғанын да қаламайды. Тараптар мәмілеге келе алмағандықтан, іс сотқа өтті.
"Автор жұмысы ол тапсырыс берушіге ғана арнап жасалады. Оңай жұмыс емес. Мұндай жұмыс өзге жұмыстан әлдеқайда қымбат жүреді. Сенім артып маған тапсырыс берген соң, шын жүрегіммен жасадым. Жұмыстың бағаланбай қалғаны өте жаман. Онымен қоса, әлеуметтік желіге мені балағаттағаны үшін де көңілім қалды, заң алдында жауап бергенін қалаймын", - дейді кондитер Нұршат Ақбергенова.